「388數據回測」港股第一股 ? 港交升個市有得升 ? 港交所真的領先指標？量化研究港交所走勢與港股的關係(上)

 

這應該是一個最多人質疑的策略，曾經我試過跟一位行內人解釋，而且給他顯示完整的數據及當中邏輯，結果︰他只係簡單說了一句「我唔信」就行開了。然後又試過有人直播話我吹水/「9up」。什至根據我小氣簿，雷神在節目亦都最少2-3次，提過我這個策略的看法。

其實每一次有人質疑我的策略，一開始我都會好想反駁，但後來我就覺得幾好，因為有人質疑就代表他們極有機會做我們「對家」，而愈多人質疑或者不相信可能更好，他們就會成為我們交易上的優勢，他們輸的錢自然就會成為我們賺的錢。

當然，這個策略其實也是源自於我的一個誤解，我細細個(10年前)就認為388港交所是港股的領先指標，只要他夠強的話，港股基本上都一定係強，所以我成日都想試下望住隻388炒港股，但我發現我次次都「食蕉」，後來我發棄了，只係近幾年先再認真研究研究388與港股有無關係 ?

第一步︰ 跟住388炒港股 ?

我自己比較專注於短炒，當然是希望透過一些股份的走勢，比到我第二日的方向。既然傳統上一直認為388是領先大市的指標，我們就由此作出假設，如果即日表現388比HSI強，收市時就買恒指好倉過夜  ; 相反，如果即日表現388比HSI弱，收市時就買恒指淡倉過夜，全部都係第二日收市時平倉。

結果，我統計了過去1000個交易日的數據，結果係-57.14%回報，即係話兩者之間根本上完全無關係，什至有一個輕微的負相關性。

證明了港交所某程度上根本不是一個領先指標，如果你每日見到港交所勁，你就追 ; 港交所廢，你就沽，輸錢機會都幾大。

當然背後原因其實跟港股近年表現有關，就係因為港股的走勢缺乏持續性，例如之前講的日升日跌。每次大家見到升勢好強/跌勢好強都容易中伏，將這個道理放入去就容易明白了。

第二步︰另類交易思路

雖然知道388不能夠成為一個領先指標，但作為反向指標效率亦都好似一般，回報太少，Drawdown亦都太大，所以我就開始思考，還是會有其他方法 ?

港股最難預測的部份，或者最令人沮喪的部份其實係明明走勢好好，但之後第二日又要低開，而令大家輸錢，我就諗如果把交易設定為即市買賣，而不是過夜，結果又會不會好一點。

即係話，如果前一日388比HSI強, 第二日開市就CALL 恆指，然後收市平倉 ; 相反，如果前一日388比hsi弱, 就PUT恆指，然後收市平倉

結果表現又真係變番做正數，5年計回報近60%，不過增長就不是一條緩緩向上的曲線，回報有60%只係因為中段時出現過一次性爆發。但好在這個策略輸錢的機會比較細，即係話如果根據只係day trade角度，388某程度又是一個領先指標。

第三步︰梳理策略的違和感

但去到這個位，開始有點奇怪，明明同一個諗法，388>HSI就買HSI。竟然過夜會輸錢，第二日開市先買又反而會賺錢 ? 亦即係話…

1. 輸錢係因為過夜做成

2. 賺錢係因為做即市而賺錢

好，去到這一步，我們嘗試再用數據去找出，如果因為388比HSI強，而好倉過夜，第二朝就即刻平倉 ; 或者388比HSI弱，就淡倉過夜，第二朝就即刻平倉。

結果，我地發現原來過去1000個交易日，單單係這個操作，就已經可以令你輸80%。

(當然，這個情況大家都一定發生過，明明好有信心好倉過夜，點解一開見到大幅低開，驚，止蝕，之後慢慢開始反彈...其實就係這一幅圖的寫照)

第四步︰把過夜同即市，兩個操作分開再結合

既然我地而家已經知道，令我地輸錢的原兇原來係過夜的部份，我地就可以反其道而行，把上面過夜輸錢的策略反轉做，再把過夜同即市兩個操作分開，再建立一個新的策略。

即係IF 388比HSI強, 收市開淡倉過夜, 開市平淡倉, 然後即市開好倉, 收市平倉

IF 388比HSI弱, 收市開好倉過夜, 開市平好倉, 然後即市開淡倉, 收市平倉

結果，當然不會讓人失望。最近1000個交易日，總回報係122%，勝率為53%(以過夜及即市賺蝕總和計算最後輸/贏)，MDD為-22%，Sharpe ratio 為1.22，算是一個擺得上台面，而且值得研究的策略。

結論︰

1. 388 與大市的確有好密不可分關係，因為外資參與比例高，其走勢對第二日港股的表現絕對有影響。

2. 388普遍來說不可以說是一個領先大市的指標，如果只係單純跟著388而衝動做交易，絕對會出事。

3. 香港市分開夜期同即市兩部份，思考策略時不妨把這兩部份分開，會有驚喜。

4. 下一次我地會試下加入一些條件來把策略再改良，包括平均線，為好淡倉額外再加入條件，睇下有無一個更好的策略出來。